Sa larangan ng edukasyon, mahalagang bahagi ang Pre-service Teaching program na nagsilbing pundasyon sa paglinang ng kaalaman, kasanayan, at pagpapahalaga sa pagtuturo. Layunin ng pag-aaral na ito na masuri kung may kaugnayan ba ang mga estratehiya sa mga hamon na nararanasan ng mga pre-service teachers na nagpakadalubhasa sa Filipino sa pagtuturo. Ginamit sa pag-aaaral na ito ang Descriptive-Correlational Research, Total Enumeration Sampling, at Survey Checklist Questionnaires.

Batay sa naging resulta ng pag-aaral, ang mga Pre-service Teachers na nagpakadalubhasa sa Filipino ay nagpakita ng mataas na antas ng kahandaan at kasanayan sa paggamit ng mga makabagong estratehiya sa pagtuturo. Ang madalas na paggamit ng mga estratehiyang tulad ng presentasyon, pangkatang gawain, at pagtatanong ay nagpapatunay na prayoridad ng mga PST ang aktibong pakikilahok at diskurso sa loob ng silid-aralan na nagpapatibay sa Cognitivist Theory of Learning. Inirerekomenda ng pag-aaral na higit pang palakasin at pagyamanin ang paggamit ng iba't ibang estratehiya sa pagtuturo ng asignaturang Filipino. Iminungkahi rin ang pagpapalakas ng kasanayang pangwika, partikular sa gramatika at bokabularyo, sa pamamagitan ng patuloy na pagsasanay at akademikong paghahanda.